కవితా సమాహారం - 7

త్రిమూర్తి స్వరూపం గురుదేవులు

సదా బ్రహ్మలు, స్వయం ప్రకాశకులు
నిరాకారులు పరబ్రహ్మ స్వరూపం
గురుదేవులకు సదా వందనం
త్రిమూర్తి స్వరూపులు, లోక కల్యాణ కారకులు
నిత్యం బ్రహ్మ భావం లో వెలుగొందుతూ
ఒక దీపం మరియొక దీపముని వెలిగించు రీతిన
తన శిష్యుల హృదయములలో పేరుకున్న
అజ్ఞానంధకారములను పారద్రోలి
జ్ఞాన దీపములను వెలిగించి
వారికి నిత్య పరమానంద ప్రాప్తి చేయు
బ్రహ్మ జ్ఞాన స్వరూపులు గురుదేవులు
గురువు లేని జీవితం చుక్కాని లేని నావ
గురుదేవుల అనిర్వచనీయమైన కృప
శిష్యులకు శ్రీఘ్రగతిన అతి దుర్లభమైన
ఆత్మ సాక్షాత్కారం కలుగజేయును
స్వస్వరూప దర్శనం ద్వారా ముక్తి మార్గమున
పయనింపజేసి పవిత్రమైన ఈ జీవితమునకు
సార్ధకత లభింపజేయును
గురువే దైవం దైవమే గురువు
గురుదేవుల పాద పద్మములు అత్యంత పవిత్రం

సర్వ మత సమానత్వం

తమను గూర్చి తీవ్ర తపనతో
చింతన చేయుటకు అంతర్ముఖులై
తెలుసుగొన యత్నించడమే సర్వ
మతముల సారాంశం
ఇతరుల మతం కంటే తమ మతమే
గొప్పదన్న అహంభావంతో
ఇతర మతములను , మతస్థులను
కించపరచడం, తిరస్కార భావం చూపించుట
అన్నింటి కంటే నిష్కృతి లేని మహా పాపం
స్వధర్మే నిధనం శ్రేయ :
అన్నది గీతాచార్యుని ఉవాచ
స్వధర్మ పాలనే అతి శ్రేయస్కరం
తమకు విధించిన ధర్మాలను
చిత్త శుద్ధితో ఒనరించడం
పవిత్ర సంస్కారాలతో, ఉత్తమ విలువలతో
సర్వ మత సమానత్వ భావనతో
జీవన యానం సాగించుటే మన కర్తవ్యం

కవితా సమాహారం 6

మానవతా విలువలు

రూపాయిలు రాజ్యమేలుతున్న ఈ కాలం లో
మానవతా విలువలు, ప్రేమానుబంధాలు
ఆప్యాతానురాగాలు, హాం ఫట్
ఆన్ని అనుబంధాలు బేరాలే !
రక్త సంబంధీకులు ,భార్యా భర్తల మధ్య
వ్యాపార సంబంధాలు వర్ధిలుతున్నాయి
రేయింబవళ్ళు కష్టపడి కడుపున బుట్టిన వారిని
సర్వం త్యాగం జెసి పెంచి పెద్ద చేసి
ప్రయోజకులుగా తీర్చి దిద్దడం కేవలం బాధ్యత (అట)
అందరినీ వదులుకొని మెట్టినింట అడుగు పెట్టడం
స్త్రీలకు జన్మత: తప్పని సరి (అట)
హృదయమంతటా కృతిమత్వంతో
మరమనుషుల వలె జీవితం వెళ్ళబుచ్చుతూ
నోట్ల కట్టలను కూడబెట్టడం ఎంత దురదృష్టకరం ?

దివ్య సందేశం

కాస్తంత దయ, కొంచెం ప్రేమ
రెండు ఓదార్పు మాటలు చాలు
మానవుని మహనీయునిగా చేయుటకు
మానవుల సహజ ఆనందమయ
స్వభావమును మరుగున పరచుకొని
సంఘర్షణాత్మకమైన వైఖరిని
అలవర్చుకొని కల్లోల భరిత హృదయం తో
హింసాత్మక పద్దతిలో దానవులవలే
జీవించడం కడు బాధాకరం
అభివృద్ధి వెంపర్లాటలో ధనార్జనే ధ్యేయం గా
సంపదల వేటలో ఈ అందమైన ప్రపంచాన్ని
కల్లోల భరితం చేస్తున్న వైనం దయనీయం
సాటి మానవుల పట్ల కరుణ మృగ్యం
ప్రేమ, దయ, వాత్సల్యం అనే మాటల చిరునామా ఏది ?
ఇతరుల పట్ల దయ చూపే తత్వం
పగ ప్రతీకారములను త్యజించడం
సర్వ మానవ సౌభ్రాతాతృత్వం అలవర్చుకోవడం
దైవ ప్రార్ధనతో హృదయాలను పవిత్రపరచుకోవడం
మానవులుగా జన్మించినందుకు మన ముఖ్య కర్తవ్యాలు
ఇదే జీసస్ ప్రభువు యొక్క సందేశం
మనందరికీ సదా ఆచరణీయం

కన్న వారి నిరాదరణ

రేయింబవళ్ళు శ్రమించి సర్వం త్యాగం చేసి
కడుపున బుట్టిన వారికి సర్వ సౌఖ్యాలు కూర్చి
విద్యావంతుల్ని గావించి ప్రయోజకులుగా తీర్చి దిద్ది
ఈ సమాజం లో ఒక గౌరవప్రదమైన స్థానాన్ని కూర్చి
ఆలుపెరగక తమ కర్తవ్య పాలన గావించిన తల్లిదండ్రులపై
కాసింతైనా దయ, ప్రేమ నేటి యువ (నవ) తరానికి
లేకపోవడం ఎంత దయనీయం ?
రెక్కలు వచ్చిన విహంగం సొంత గూడు వదిలి
ఎగిరిపోయిన చందాన స్వతంత్రులు కాగానే
ఎల్లలు లేని అవకాశాల ఆకాశం లో
తమ అదృష్టాన్ని పరీక్షించుకుంటూ
తన వారినందరినీ గాలికొదిలేసి ఎగిరిపోయే మేధావుల్లారా !
మీకు జ్ఞానోదయం కలిగేదెన్నడు ?
తల్లిదండ్రుల ఋణం ఎన్నటికీ తీర్చుకోలేనిది
వారిని అనాదరించుట దైవ దూషణతో సమానం
ధన సంపాదన మత్తులో కన్నవారిని నిర్లక్ష్యం చేయుట
అన్ని పాపాలలో కెల్లా నిష్కృతి లేని అతి హేయమైన పాపం

కవితలు 5

కరుణామయుడు

కరుణ ,దయ, ప్రేమలకు ప్రతిరూపం మన జీసస్
యావత్ ప్రపంచమంతా నిరాశా,నిస్పృహ, దుఖం, కష్టాల కడలిలో
కొట్టుమిట్టాడుతుండగా బెత్లెహాము నగరం లో
వేకువజామున మెరిసిందొక ధృవతార
జీసస్ నామధేయంతో దిన దిన ప్రవర్ధమానమై
శిష్ట జన సంరక్షణకు స్వయం గా
నడుం కట్టింది ఆ పరమాత్మ స్వరూపం
పాలకులే పాతకులై పాశవికత జూపి
శిలువ నెక్కించగా చిరునవ్వుతో సకల ప్రాణ కోటి కొరకు
తన రక్తం చిందించి అశువులు బాసిన కరుణామయుడు
పాపాత్ములను సైతం పరిశుద్ధులను గావించి
తద్వారా జీవన్ముక్తిని ప్రసాదించిన దేవదేవుడు
వెన్న కంటే మృదువైన మనసుతో
తనను శరణు జొచ్చిన వారిని చివరికంటూ కాపాడిన దయామయుడు
హేళన జేసిన వారిపై లాలన, దూషించిన వారిపై కరుణ
సమాంతరం గా కురిపించిన కరుణామయుడు
ప్రేమ,దయ, కరుణ, సత్యం లకు నిర్వచనం జీసస్ ప్రభువు

దేశ భాషలందు తెలుగు లెస్స !

దేశ భాషలందు తెలుగు లెస్స
ఇటాలియన్ ఆఫ్ ది ఈస్ట్ గా యావత్
ప్రపంచమంతటా వేన్నోళ్ళ కీర్తింపబడుతున్న గొప్ప భాష
తేనె కంటే తీయనైన కమ్మని భాష
ప్రాచీన హోదా లభ్యం కోట్లాది ఆంధ్రులకు గర్వకారణం
మాతృ భాషాభిమానులలో ఉప్పొంగిన ఆనందం
మమ్మీ డాడీ సంస్కృతికి ఇక పలకాని మనం వీడ్కోలు
భావి తరాలకు కమ్మని తెలుగు
పలుకుల సొగసులను అందించడం మన కర్తవ్యం
పర భాషా వ్యామోహంతో మాతృ భాషకు
దూరం కావడం శోచనీయం
మాతృ భాషను నిర్లక్ష్యం చేయడం
కన్న తల్లిని అగౌరవపరచడం తో సమానం
ప్రాచీన భాష హోదాతో మన భాషా సంస్కృతులను
పరిరక్షించి కమ్మని తెలుగు భాషపు
పరిమళ సుగంధాలను దిగంతాలకు వ్యాపింపజేయడం
తెలుగు భాష వికాసం, వ్యాప్తిలకు కృషి సల్పడం
తెలుగు వారిగా మన ప్రధమ కర్తవ్యం
తెలుగు తల్లికి జై
తెలుగు తల్లి ఒడిలో సేద తీరడం
ఒక అనిర్వచనీయమైన అనుభూతి
అన్ని భాషలలోన ఎన్నదగిన సాహితీ శిఖరం తెలుగు

అభినందనల మందారం

ఎన్నో వేల జన్మల పుణ్య ఫలం
ఫలితం మనకు లభించిన మానవ జన్మ
సకల జీవ ప్రాణులన్నింటిలో కెల్లా
మానవులకు మాత్రమే లభించిన అపురూప వరం వాక్కు
మనస్సులోని ఉద్వాగాలను,భావాలను
అద్భుతం గా వెల్లడించగల శక్తి "మాట"
అందమైన భాష మాటకు ఆలంబన
మదిలో మెదిలే ఆలోచనలకు వస్త్రాలంకారం
అభినందనలు తెల్పుటు మన భాషను
సద్వినియోగపరచుటకు బహు చక్కని అవకాశం
ఎదుటి వారి మంచితనం , సహృదయత,సుగుణాలు
ఒనరించిన మహోపకారములకు
మనస్పూర్తిగా మెచ్చుకొనుటయే అభినందన
అభినందనలు తెల్పుట మన సంస్కారానికి
విశాల హృదయానికి ఒక గీటురాయి
ఎదుటివారిని అభినందించడం వలననే
మనకు అభినందింపబడడమనే అర్హత లభ్యం
ఈర్ష్యానుద్వేషాలు,మద మాత్సర్యాలు తొలగిపోయి
సర్వ మానవ సౌభృతృత్వం , సర్వ జీవ సమానత్వం
కలిగి వసుదైక కుటుంబం స్థాపనకు నాంది
సమ దృష్టి, సమ భావం సహృదయత్వం కలిగి
మనస్సు స్పటికం వలే స్వచ్చం పవిత్రమగును
మానవ జన్మకు లభించును సార్ధకత

కవితలు - 4

నిష్కృతి లేని పాపములు

కష్టాల కల్లోలం చుట్టుముట్టినప్పుడు
భగవంతుడు జ్ఞప్తికి వచ్చుట తీవ్రమైన వేదనతో
కష్ట నష్టములను దూరమొనర్చమని
కోరికల మూటతో ప్రార్ధన గావించడం,
అనంతరం భగవంతుడిని మరచుట మానవ నైజం
సుఖముల పానుపుపై తేలియాడే సమయమందు
భగవంతుడిని జ్ఞప్తికి చేసుకోవడం బహు అరుదైన విషయం
స్వార్ధపు చింతనతో కోర్కెల మూటతో చేయు
ప్రార్ధనలు ఆ సర్వేశ్వరుడిని చేరలేవు
చిత్త శుద్ధి లేని శివ పూజ ఫలించదు
భగవంతుడిని కష్ట నష్టములను తీర్చెడి
యంత్రము వలే భావించే నేటి తరం మానవునికి
భక్తి, ముక్తి, మోక్షం అసాధ్యం
అనుక్షణం భగవంతుడిని జ్ఞప్తికి తెచ్చుకొని
ఆయన అనుగ్రహ ఫలం వర్షించని క్షణం
వ్యర్ధమని తలుస్తూ కష్ట సుఖములను
ఆయన పవిత్ర ప్రసాదము గా భావించి
ఆనందం గా యధాతధముగా స్వీకరించడమే
నిస్వార్ధ , నిష్కల్మష భక్తుల తత్వం
రక్తి, విరక్తి అను నవి భక్తికి కారణములే
సుఖములలో మునిగి భగవంతుడిని విస్మరించుట ,
కష్టములు ఎదురైనప్పుడు నిందించుట కూడని పనులు,
ఈ పాపములకెన్నడూ నిష్కృతి లేదు

పించనుదారుల వెతలు

జీవితమంత అంకిత భావం తో
పని చేసినందుకు పదవీ విరమణానంతరం
ఇచ్చెడి గౌరవ భృత్యం పించన్లు
చాలీ చాలని భృత్యాలను అందుకునే
పించనుదారులంతే అందరికీ అగౌరవమే
జీవితాన్ని నెట్టుకురాలేక వారి వెతలు వర్ణనాతీతం
నింగికి ఎగిసే ధరలు, ముంచుకొస్తున్న వ్యార్ధకం
రోజురోజుకూ క్షీణించే ఆరోగ్యం
అయినా వారి కందించే భృత్యం అంతంత మాత్రం
సజీవులై వున్నామని నిరూపించుకోమని
రోజు కొక తల తిక్క నిబంధనలు
చేతులు తడపనిదే కదలని కాగితాలు
ప్రభుత్వాలు మారినా కించితైనా మారని వారి జీవన గతి

ఆత్మ తత్వం


ఏకమైవా ద్వైతం బ్రహ్మ అన్నది ఆర్యోక్తి
ఈ సృష్టి అంతటా నిండి వున్న పర బ్రహ్మం ఒక్కటే
అజ్ఞానం వలన అనేకమైనట్లు గోచరించును
సాధన సమయం లో ద్వైత భావనను అనుభవించు సాధకుడు
సద్గురువు కృప వలన ఆత్మ సాక్షాత్కారమును పొంది
హృదయం లో అజ్ఞానపు చీకట్లు తొలిగి
జ్ఞాన జ్యోతి ప్రకాశించినప్పుడు ద్వైత భావన నిష్క్రమించి
అద్వైతం అనుభవమగును,
సాధకుడు ముముక్షువగును
బ్రహ్మానంద భరితమైన ఆత్మ తత్వం
తన నిజస్వరూపమన్న సత్యం అవగతం
అదే ఆత్మ పరమాత్మల సంగమం

తెలుగు భాష వైభవం

తేనె కన్నా తీయనిది తెలుగు భాష
తెలుగు మాధుర్యం , గొప్పదనం వర్ణనాతీతం
తెలుగు భాషా పరిమళం, సుగంద భరితం
ప్రపంచీకరణ నేపధ్యం లో పరభాషలపై పెరిగిన మోజు
తెలుగు భాషకు అంతట నిరాదరణ
తెలుగు సాహిత్యం చదివే వారే కరువు
తెలుగు మాధ్యమ బోధన నానాటికీ అంతరార్ధం
మమ్మీ డాడీ సంబోధనలు కుటుంబాలలో కూడా
తెలుగును తరిమేసి ఆంగ్లేయమయం చేసాయి
అధికార భాషగా అమలులో పాలకుల నిర్లక్ష్యం
ప్రతీ ఎటా మొక్కుబడి కార్యక్రమాలు, సదస్సులు
తీర్మానాలు , ఫొటోలతో హంగామా
మాతృభాషను చిన్నచూపు చూడడం
కన్న తల్లిని అవమానించినంత పాపం
అందుకే నానాటికీ కళను కోల్పోతున్న
తెలుగు భాషకు జీవం పోసేందుకు
తెలుగు బిడ్డలందరం నడుం కడదాం
తెలుగు భాషకు ప్రాచీన వైభవాన్ని పునరుజ్జీవజింపజేద్దాం

కవితలు - 3

నిష్కృతి లేని పాపములు

కష్టాల కల్లోలం చుట్టుముట్టినప్పుడు
భగవంతుడు జ్ఞప్తికి వచ్చుట తీవ్రమైన వేదనతో
కష్ట నష్టములను దూరమొనర్చమని
కోరికల మూటతో ప్రార్ధన గావించడం,
అనంతరం భగవంతుడిని మరచుట మానవ నైజం
సుఖముల పానుపుపై తేలియాడే సమయమందు
భగవంతుడిని జ్ఞప్తికి చేసుకోవడం బహు అరుదైన విషయం
స్వార్ధపు చింతనతో కోర్కెల మూటతో చేయు
ప్రార్ధనలు ఆ సర్వేశ్వరుడిని చేరలేవు
చిత్త శుద్ధి లేని శివ పూజ ఫలించదు
భగవంతుడిని కష్ట నష్టములను తీర్చెడి
యంత్రము వలే భావించే నేటి తరం మానవునికి
భక్తి, ముక్తి, మోక్షం అసాధ్యం
అనుక్షణం భగవంతుడిని జ్ఞప్తికి తెచ్చుకొని
ఆయన అనుగ్రహ ఫలం వర్షించని క్షణం
వ్యర్ధమని తలుస్తూ కష్ట సుఖములను
ఆయన పవిత్ర ప్రసాదము గా భావించి
ఆనందం గా యధాతధముగా స్వీకరించడమే
నిస్వార్ధ , నిష్కల్మష భక్తుల తత్వం
రక్తి, విరక్తి అను నవి భక్తికి కారణములే
సుఖములలో మునిగి భగవంతుడిని విస్మరించుట ,
కష్టములు ఎదురైనప్పుడు నిందించుట కూడని పనులు,
ఈ పాపములకెన్నడూ నిష్కృతి లేదు

కవితలు - 2

మండుతున్న ధరలు

కూరగాయల ధరలకు సామాన్యుల బెంబేలు
రోజు రోజుకూ రాకెట్ల కంటే వేగం గా
ఆకాశ పధాన దూసుకుపోతున్న ధరలు
పెట్రో మంటలు పోస్తున్నాయి అగ్నికి ఆజ్యం
సంచీ నిండా డబ్బుతో జేబులో కూరగాయలు
కొనుక్కుంటున్న దుర్భర పరిస్థితి
వ్యవసాయ భూములు బడా సంస్థలకు ధారా ధత్తం
ఏటేటా తరిగిపోతున్న వ్యవసాయ ఉత్పత్తులు
రైతు బజారులు అవుతున్నాయి నిర్వీర్యం
అతి వృష్టి, అనావృష్టి లతో రైతన్నలకు తోచదు దిక్కు
ఎంత కష్టించినా రైతులకు అందని ఫలం
దళారులు అవుతున్నారు కుబేరులు
చాలీ చాలని జీతాలతో అధిక ధరలతో
సగటు పౌరుల బ్రతుకు నానాటికీ అధ్వాన్నం
పుట్ట గొడుగుల్లా పుట్టుకొస్తున్న రెస్టారెంట్లకు
తరలిపోతున్నాయి మనకు చెందాల్సిన కూరగాయలు
ఉన్న వాడికి ధరలెంత పెరిగినా పట్టదు
లేని వాడికి ధరలతో నిమిత్తం లేదు
మధ్య వాడికే రగులుతోంది కడుపులో మంట
ఎన్నటికీ చల్లారేను ధరల మంత
ఏలికలకు కను విప్పు ఎన్నడు ?

పాఠశాల

అందమైన దేవాలయం బడి
జీవితం లో ఎదిగేందుకు మహోన్నతమైన
వ్యక్తిత్వం సాధించేందుకు
భౌతికమైన కోర్కెలను తీర్చుకునేందుకు
వల్సిన అర్హతలను అందించునది బడి
బడి ప్రభావం మనపై ఇంతింత కాదయా !
అ, ఆ లు దిద్దించే స్థితి నుండి
పి హెచ్ డి వంటి ఉన్నతమైన డిగ్రీ లను
అందించు పరమ పవిత్ర దైవ సన్నిధానం బడి
మానవ జీవితాన్ని తీర్చి దిద్దే బడిని
అపవిత్ర మొనర్చుట క్షమించ రాని నేరం
ప్రేమ కలాపాలు, అత్యా చారాలు,దౌర్జ్యనాలు,
లైంగిక వేధింపులు మితి మీరి పోవుట శోచనీయం
చదువుల తల్లి సరస్వతికి వ్యధ కల్గించుట బాధాకరం
మానవులను మహనీయులుగా తీర్చి
జీవితం లో మహోన్నతమైన శిఖరాలను అధిరోహింపజేసే
బడి ఋణం ఎన్నటికీ తీర్చుకోలేనిది
బడియే మనకందరకు గుడి

కవితలు 1

సత్కీర్తి

జీవితానికొక గమ్యం, లక్ష్యం అత్యావశ్యకం
ఆ లక్ష్య సాధనకు నిర్ధుష్ట్యమైన ప్రణాళిక
శక్తి సామర్ధ్యాలను కూడ గట్టుకొని
కష్టాలకు,సమస్యలకు చెదరక
చెక్కు చెదరని ఆత్మ విశ్వాసం తో
కార్య సాధనే ధ్యేయం గా ఏకోన్ముఖం గా
ముందుకు సాగితే అనితర సాధ్యమైన
కార్యములను సాధించుట సాధ్యం
జీవన గమనం లో నిర్దేశించిన కార్యములను
అంకిత భావం తో నిర్వర్తించవలెను
కృషితో నాస్తి దుర్భిక్షం.
చంచలత్వం, సోమరితనం, అలసత్వం
నిర్లక్ష్యం ఇత్యాది దుర్గుణముల వలన
మనిషి జీవితం అధ:మ పాతాళానికి క్రుంగిపోవును
చరిత్రలో చిర స్థాయిగా నిలిచి పోయే సత్కర్మలను
మనము ఒనరించుట అత్యావశ్యకం

సత్వ గుణం

త్రిగుణాల కలయికే ఈ ప్రపంచం
రజో, తమ గుణములు మనిషి వివేకాన్ని హరించి
అసురీ లక్షణములను వృద్ధి చేయును
సత్వ గుణం గల్గిన మానవుడు దేవునికి ప్రీతికరం
ఉత్తముల సాంగత్యం, సద్గ్రంధ పఠనం,
భగవత్ ధ్యానం, నామ సంకీర్తన, పూజ, జపం
ఇత్యాది మార్గములెన్నో శాస్త్రములో మనకు లభ్యం
తీవ్రమైన తపనతో, సాధనతో
రజ, తమో గుణములను తగ్గించుకుంటూ
భగవత్స్వరూపమైన సత్వ గుణమును
పెంపొందించుకుంటూ సన్మార్గ వర్తనుడై
చరించడం ఎంతో శ్రేయస్కరం

ఆత్మ విమర్శ

ఆత్మ విమర్శ ప్రతి మానవుడు అలవర్చుకోవల్సిన సద్గుణం
తన లోని దోషాలను దర్శించుకొని
వాటిని సరిదిద్దుకునే ప్రయత్నం
చిత్త శుద్ధితో ఒనరించడం అత్యావశ్యకం
ఆత్మ విమర్శ వలన ఇతరులను విమర్శించుట
వారి యందు దుర్గుణాలను చూచి
అనుచిత మైన వ్యాఖ్యలను చేయుట
ఇతాది అవలక్షణములు నశించిపోవును
హృదయం పరిశుద్ధం అగును
సర్వ వ్యాపకత, సర్వ జీవ సమానత్వం
అనుభవించుట సాధ్యమగును
అహంకారాది దోషాలు నశించి
మానవీయ స్వభావం పెంపొందును
పూర్ణ దైవత్వ సిద్ధి సాధ్యం
తన దినచర్యలో భాగం గా
ప్రార్ధనతో సహితం గా
ఆత్మ విమర్శ విధిగా చేయు
మహాత్ముని జీవన విధానం మనకు ఆదర్శం

భధ్రత లేని రైల్వే ప్రయాణాలు

రైలు ప్రయాణమంటే గుండెల్లో గుభేల్
నానాటికీ ఎక్కువౌతున్న రైలు ప్రమాదాలు
ఏటా వేల సంఖ్యల్లో ప్రాణాలు కోల్పోతున్న అమాయకులు
అయినా ప్రభుత్వాలకు చీమైనా కుట్టనట్లు వుండని స్థితి
భద్రతా నిభంధనలను గాలికొదిలేస్తున్న అధికారులు
పెరగని ట్రాకులు , పెరిగే రైళ్ళు
తూ టూ మంత్రం గా మరమ్మత్తులు
ప్రమాదాల పిదప హంగూ,ఆర్భాటం చేసే అధికారులు
నామమాత్రమైన పారితోషికాలు
హడావిడిగా ఎంక్వయిరీ కమీషన్లు
ఆ పై నిపుణుల వివేదికలు బుట్టదాఖలు
ప్రతీ సారి కొండంత హామీలను గుప్పించే మంత్రి వర్యులు
అనంతరం షరా మామూలే
రైల్వే ప్రయాణాలు ఎప్పటి లాగనే సామాన్యుల పాలిటి మృత్యు దేవతలు

చింతన మంటలు

చితి మంటల కంటే హృదయం లో రేగే
చింతన మంటలు మరీ దుర్భరమైనవి
నిర్జీవమైన పార్ధీవ దేహాన్ని కాల్చునది చితి
సశరీరులుగా వుండగానే దహించునది చింతన
అనుక్షణం నరక అనుభవం చవి చూపునది చింతన
శారీరక గాయములు ఔషధ సేవ వలన ఉపశమనం
మానసిక గాయం ఏ ఔషధములకు లొంగనిది
మానవులను ప్రతీ క్షణం దహించి వేయునది
అసూయ, అహంకారం,లోభం,మోహం రౌద్రం,క్రోధం ఇత్యాది
అసురీ లక్షణములు మానవులలో చింతనను పెంచును
చిత్ర విచిత్రమైన వ్యాధులకు శరీరం అలవాలమౌతుంది
చింతన నుండి బయట పడడం మన తక్షణ కర్తవ్యం
ధ్యానం, యోగం,ప్రాణాయామం, భగవన్నామస్మరణ
సత్సంగం, సద్గంధ పఠన, పుణ్య క్షేత్ర దర్శనం
మహా పురుషుల పాద స్పర్శనం ఇత్యాది సత్కర్మల వలన
హృదయమును పవిత్ర పరచుకొని సన్మార్గం లో
నడత సాగించిన ఎట్టి చింతనలు దరి చేరవు

వర్తమానం లో జీవనం

జరిగిన సంఘటనలను గూర్చి చింతిస్తూ
జరుగబోయే వాటి గురించి ఆందోళన చెందుతూ
వర్తమానాన్ని వృధా చేసుకొను వారు అవివేకులు
వర్తమానం బహు అమూల్యం
భూత కాలం చెల్లని నోటు వంటిది
భవిష్యత్తుకు వర్తమానం లో విలువ లేదు
గతం లో చేసిన పొరపాట్లను విశ్లేషించుకొని
తద్వారా విలువైన పాఠాలను నేర్చుకొని
భవిష్యత్తులో సాధించబోయే కార్యములకు
ప్రణాళికలు వేసుకొని, నిర్ధుష్టమైన
లక్ష్యాల నేర్పాటు చేసుకొని
వర్తమానం లో శ్రమించడమే విజయ సూత్రం
నిన్న లేదు , రేపు రాదు మనకు మిగిలినది నేడు మాత్రమే
అన్న సూక్తి బహు అమూల్యమైనది
సంతోషం, సౌందర్యం, ఆనందం అనుభవించుటకు
వర్తమానం లో జాగృదావస్థలో జీవించడం అత్యావశ్యకం
ఎడ తెగని వల్లమాలిన ఆలోచనలు
మానవులకు వర్తమానం లో జాగృదావస్థలో
జీవనానికి అవరోధాలు
ధ్యానం, యోగం ల ద్వారా మనసును
నియంత్రించుకోవడం వర్తమానం లో
జీవించుటకు కృషి సల్పడం మన తక్షణ కర్తవ్యం

కానరాని మంచి సినిమా

రేలంగి రాజ బాబుల హాస్యం
ఘంటసాల, సుశీలమ్మ ల గాన మాధుర్యం
మల్లాది, అత్రేయ ల సాహిత్యం
స్వర రాజేశ్వర రావు, మామ మహదేవన్ ల సంగీతం
బాపు బొమ్మ ల్లాంటి నటీనటులు
ఆదుర్తి, విశ్వనాధుల సృజనాత్మకత
నేటి మన చిత్రాలలో పూర్తిగా మటుమాయం
అపహాస్యం అవుతున్న హాస్యం
అంగాంగ ప్రదర్శనలతో వ్యాయామం లాంటి నృత్యాలు
అర్ధం కాని మాటలు, అరుపు ల్లాంటి పాటలు
హోరెత్తించి శిరోభారం తెప్పిస్తున్న వాయిద్యాల ఘోష
అడుగడుగుకీ రక్త పాతం, పస లేని కధలు
ఇదీ నేటి చిత్రాల పరిస్థితి
నానాటికీ సంఖ్య ఎక్కువౌతున్నా వాసి తగ్గుతోంది
కుటుంబమంతా కలిసి చూదదగిన చిత్రాలు కనుమరుగు
మళ్లీ ఎన్నటికి వచ్చేను మంచి సినిమా ?

రోజుకో దినం మనకొద్దు

మదర్స్ డే, ఫాదర్స్ డే,సిస్టర్స్ డే
నాన్ ఆల్కహాలిక్ డే, డైబటీస్ డే,అంటూ రోజుకొక దినం
మన దేశం లోకి చొచ్చుకొస్తున్న వైనం ఎంత విచిత్రం
కని పెంచిన తల్లిదండ్రులను సర్వాకాల సర్వావస్థలయందు
గుర్తుంచుకొని కంటికి రెప్పలా కాపాడుకోవడం మన విధి
రక్తం పంచుకు పుట్టిన తోబుట్టువులను నిండు మనస్సుతో ఆశీర్వదించి
ఎల్లవేళలా వారికి అండ గా నిలబడడం మన రక్తం లో జీర్ణించుకున్న సాంప్రదాయం
మన సిరి సంపదలను, ఆయువు, ఆరోగ్యాలను నాశనం చేసి
అధమ: పాతాళానికి త్రొక్కి వేసే చెడు వ్యసనాలకు ఎల్లప్పుడు
దూరం గా వుండడం మన తక్షణ కర్తవ్యం
అహారాది నియమాలను, జాగ్రత్తలను అనుక్షణం పాటించి
సంపూర్ణ ఆరోగ్యం తో నిండునూరేళ్ళు ఆనందదాయక
జీవితం గడపడం మన లక్ష్యం కావాలి.
ఈ సిద్ధాంతాలన్నింటినీ ఆచరణపూర్వకం గా
మనకు అందించే మన హైందవ సాంప్రదాయం అద్భుతం
రోజుకో దినాన్ని పాటించమని చెప్పే పాశ్చాత్య సంస్కృతి మనకొద్దు

కఠోర వచనములు

సర్వం బ్రూయాత్,ప్రియం బ్రూయాత్, న బ్రూయాత్ సత్య మ ప్రియం
ఎల్లప్పుడు సత్యమును, మధురమైన మాటలను పలుకవలెనన్నది ఆరూక్తి
అప్రియ భాషణం అన్ని పాపాలలో కెల్లా నిష్కృతి లేనిది
పరుల నింద, కఠోర భాషణం , మనసును గాయపరచు విధం గా ఆరోపణలు చేయడం నిషిద్ధం
పరిహాసమునకైనా కఠోర భాషణం గావించడం అత్యం త పాపం
తూటాల వంటి వాగ్భాణాలు హృదయాన్ని చిధ్రం చేయును
మానవులలో సత్సంబంధాలను చిన్నా భిన్నం చేయును
ప్రియ భాషణం తేనె వలే మధురమైనది
శత్రువులను సైతం దరికి చేర్చి సంబంధ బాంధవములను పటిష్టం చేయును
ఎల్లవేళలా ప్రియ భాషణం గావించడం వాచిక తపస్సు
అన్ని తపస్సుల కంటే మేలైనది, మానవులను మహనీయులుగా మార్చునది
కఠోర వచనములను పలికి దశరధుని మరణానికి కారకురాలైన కైకేయి
రాయబారములో కృష్ణ భగవానుడిని తూలనాడి
తన వంశ నాశకుడైన దుర్యోధన సార్వభౌముల కధలు
సదా కావాలి మనకు స్పూర్తి దాయకం
కఠోర వచనములను సర్వదా తృజించడం శ్రేయస్కరం

బుద్ధుని జీవితం సదా స్మరణీయం

బుద్ధం శరణం గచ్చామి
సంఘం శరణం గచ్చామి
ధర్మం శరణం గచ్చామి
ఇతరుల కష్టాలను తనవిగా భావించి
వాటిని తీర్చుటకు అనుక్షణం తపించి
పరుల కొరకే తన జీవితాన్ని అంకితం చేసిన
బుద్ధుని జీవితం మనకు స్పూర్తిదాయకం
స్వచ్చమైన, పవిత్రమైన,ఉన్నతమైన వ్యక్తిత్వం గల్గిన
గౌతముడు జగద్గురువు,ఆర్త లోక పరాయణుడు
లోక కల్యాణం కోసం యావత్ సంసారమును
సంసారిక సుఖములను త్యాగం చేసి
సత్యాన్వేషణ కోసం తీవ్ర తపస్సు ఒనరించి
బోధి వృక్షం ఒడిలో ఆత్మ సాక్షాత్కారం సాధించిన బుద్ధుని జీవితం
పరమ పవిత్రం, ఆదర్శనీయం
సుఖమిచ్చు ఆనందం కంటే దుఖం కల్గించే బాధ ఎక్కువనియు
దుఖానికి మూలకారణమైన కోరికలను
జయించమన్న బుద్ధుని సిద్ధాంతం సదా ఆచరణీయం
అహింసా మూర్తి, కరుణాపూరిత హృదయంతో
సదా సత్యాన్వేషణ గావించే
బుద్ధుని పాదాలే మనకు శరణ్యం
దురాలోచనలను పారద్రోలి, ఏకాగ్రతతో ధ్యానమొనరించి
హృదయాన్ని పవిత్రం చేసుకొనడమే మన కర్తవ్యం
బుద్దుని సదా స్మరిస్తూ అడుగుజాడలలో నడుద్దాం
మన జీవితాలను పరోపకారానికే వినియోగిద్దాం

సగటు మానవుడు

మ్రోగింది ఉప ఎన్నికల నగారా
ఎ సి రూముల నుండి బయట కొచ్చిన నేతలు
వివిధ రాజకీయ పక్షాలు ఆరంభించాయి బురద జల్లుకోవడం
ఒకరిపై మరొకరి మాటల తూటాలు
పేదవాడిపై నేతలలో హఠాత్తుగా ఉప్పొంగిన అభిమానం
చాలీ చాలని జీతాలతో కడుపు నింపని పనులతో
రోగ గ్రస్థమైన శరీరాలతో దుర్భరమైన
జీవితం గడుపుతున్న పేదవాడు అందరికీ
మరొక్కసారి గుర్తుకొచ్చాడు,అయ్యాడు ఓటరు దేముడు
ఘరానా నేతల నుండి అందుకుంటున్నాడు దండాలు
భగీరధ వాగ్దానాలు కురుస్తున్నాయి అతనిపై
సిద్ధాంతాలు పొసగకపోయినా చేతులు కలిపి
అనైతిక పొత్తులతో, రాత్రికి రాత్రే స్నేహం కలిపి
బద్ధ శత్రువులు కలిసి వచ్చిన వైనాన్ని
అతి చోద్యం గా చూస్తున్నాడు
అయినా మనసులో ఏ మూలో ఈ బ్రతుకులు మారవన్న
గట్టి నమ్మకం బలపడి పోయింది
తన ఓటుతో గద్దె నెక్కి తనపై స్వారీ చేసే
ఈ నేతలపై రవ్వంత విశ్వాసం కూడా లేదు
ఎన్నికలయ్యాక షరా మామూలే నేతలందరూ అంతర్ధానం
పల్లెలో సందడి మటుమాయం
తన జీవిత పోరాటం యధావిధిగా సాగుతుంది
ఈ భారతావనిలో సగటు మానవుని బ్రతుకు ఇంతే

ఆదర్శ పాలకులు

ప్రజలను పాలకులు బహు చక్కగా పాలించిన
దేశం సుభిక్షమౌతుందన్న భర్తృహరి
సుభాషితం మనకు ఆదర్శం
సనాతన పాలక ధర్మాలకు త్రిలోదకాలనిస్తూ
పదవి కోసం అనుక్షణం తపిస్తూ, తపన పడుతూ
పదవి నలంకరించిన అనంతరం
ప్రజా సంక్షేమాన్ని విస్మరించే
నేటి పాలకుల వైఖరి శోచనీయం
పదవి శాశ్వతం కాదు, ప్రజాహిత
కార్యక్రమముల ద్వారా అందరి
జీవితములలో వెలుగు నింపి తద్వారా
సాధించు సత్కీర్తియే శాశ్వతమన్న సత్యాన్ని విస్మరించిన
మన నేతాశ్రీలలో ఎన్నడు కలిగేను జ్ఞానోదయం ?
అధర్మం గా పెంచుకున్న ఆస్తులు అంతస్తులు
ఏనాటికైనా మంచు గడ్డ వలె తరిగిపోవడం తధ్యం
మంచి పాలకునిగా ఆర్జించుకున్న ఖ్యాతియే
ఆకాశం లో నక్షత్రాల వలే శాశ్వతం
అనుక్షణం పదవిని అంటిపెట్టుకొని వుండుటకు
అడ్డదారులు తొక్కే ప్రజా కంటకులకు
ఏనాటికైనా తప్పదు చీత్కారం
ఉన్నత పదవులను అధిష్టించే నేతలకు
కావాలి ఆదర్శమయ జీవన విధానం
ప్రజా సేవయే వారి పరమార్ధం కావాలి
ప్రజల కోసం అనుక్షణం తపించు వారు
సామ్రాట్ అశోకుని వలే చిరస్మరణీయులు
దేశం కోసం సర్వస్వం త్యాగం చేసిన
టంగుటూరి,పొట్టి శ్రీరాములు, మహాత్ముడు
వారికి కావాలి స్పూర్తి దాయకం
వారి అడుగు జాడలలో నడవడమే నేతల కర్తవ్యం

నిస్వార్ధ జీవనం

ఎల్లలు లేకుందా పోతున్న మానవుల స్వార్ధం
ఈ సృష్టిలో వున్న ప్రతీ వస్తువునూ
తానే పూర్తిగా అనుభవించాలన్న స్వార్ధం
డబ్బు సంపాదన కోసం పశువు కంటే హీనం గా కష్టిస్తూ
సంపాదించిన డబ్బును అనుభవించక
ఆస్తులు, అంతస్తుల రూపం లో కూడబెట్టి
జీవితపు చరమాంకం లో దాయాదులకు అర్పణం
విధివంచితులై ఆకలితో అలమటించే
అన్నార్తులకు ఒక్క పైసా నైనా
దానం చేయలేని బలి చక్రవర్తి వారసులం
ధనార్జనలో మానవ సంభంధాలన్నీ దూరం
మమతానురాగాలకు, అప్యాయతానుభవాలకు లేదు స్థానం
వయసు ఆకర్షనలో పడి అనుభవించాలన్న
స్వార్ధం తో అనైతిక సంబంధాల నేర్పాటు
వంట మనిషి వలె, ఇంటి పనంతటిని చక్కబెడుతూ
కావల్సినప్పుడు సుఖం అందించేందుకే స్వార్ధం తో
పురుష పుంగవులు వివాహం చెసుకుంటున్న వైనం శోచనీయం
స్వార్ధ చింతన విషం కంటే ప్రమాదపూరితం
మానవులను అధ: పాతాళానికి క్రుంగదీయును
ఒక్క విషపు చుక్క కడివెడు పాలను విరుచునట్లు
ఒక్క స్వార్ధపు ఆలోచన ప్రశాంతం గా వుండే మనస్సును
కల్లోల భరితం ,అతలాకుతలం చేయును
నిస్వార్ధ జీవనమే అందమైన జీవితానికి సోపానం

సర్వే జనా సుఖినోభవంతు

మానవ జీవితం బహు అమూల్యం
ఎన్నో వేల హీన జన్మలననంతరం మాత్రమే లభించునది
కోట్ల ప్రాణులలో కొన్నింటికీ మాత్రమే దక్కునది
కుసంస్కారాలతో,ధనాశతో,అహంకారం తో
అరిషడ్వర్గాలకు లోబడి హింసాయుత ప్రవృత్తితో
విషయానందాలకు బానిసలమై
మానవతా విలువలను త్రుంగలోకి తొక్కి
సంభంధ భాంధవ్యాలను మరిచిపోయి
పశువుల కంటే జీవించడం శోచనీయం
దీనికి ప్రతిఫలం భవిష్యత్తులో లభించు హీన జన్మలు
సద్గుణాలను అలవర్చుకొని, భక్తి భావం పెంపొందించుకొని
ఉన్నతమైన ఆశయాల సాధనకు ఉపక్రమించి
మనం ఆనందం గా బ్రతుకుతూ
ఇతరులను బ్రతికిస్తూ
మన ఆనందాలను, ఐశ్వర్యాలను వీలైనంతగా
మన తోటి సమాజస్థులకు పంచి ఇస్తూ
సర్వే జనా సుఖినోభవంతు అను రీతిన
బ్రతుకు - బ్రతికించు అన్న సిధాంతాన్ని
త్రికరణ శుద్ధిగా ఆచరిస్తూ, ఆత్మ విశ్వాసం తో
ఆత్మ స్థైర్యం తో , పరిశుద్ధమైన మనసుతో
ముందడుగు వేసిన వారి జీవితం ధన్యం

జీవన విధానం

డబ్బు చుట్టూనే పరిభ్రమిస్తున్న ప్రపంచం
ధనార్జనే ధ్యేయం గా, పరమావధిగా
పశువుల కంటే హీనంగా కష్టిస్తున్న మానవుడు
తద్వారా సంపాదించిన ధనాన్ని అనుభవించేందుకు
సమయం,ఓపిక,ఆరోగ్యం అసలే లేవు
కూడబెట్టిన అస్థులన్నీ దాయాదుల వశం
ఆకలితో అలమటించే అన్నార్తులకు నయాపైసా
దానం చెయ్యలేని గొప్ప దయా హృదయం మనది
డబ్బు, కీర్తి, పదవి కాంక్షలు తలెకెక్కిన మత్తులో
నా అన్నవారినందరినీ దూరం చేసుకొని
ఈ సమాజం లో ఒంటరి జీవనం సాగిస్తున్న మానవుడు
ఖాళీ చేతులతో వచ్చి, తన స్వంతం అనుకున్న వాటిని
విడిచి పెట్టి ఖాళీ చేతులతోనే ఈ ప్రపంచాన్ని
విడిచివెళ్ళాలని తెలియనిది ఎవరికి ?
అయినా వీసమెత్తు దానగుణం ప్రదర్శించలేని
గొప్పవారము మనమందరం
తమ కంటూ వున్న దానిని సమానం గా పంచుకు తింటూ
ఆనందం గా, ఏ చీకూ చింతలు లేక ఆనందమయ
జీవనం సాగించే పశు పక్ష్యాదుల జీవన విధానమే ఎంతో శ్రేష్టం

అందమైన జీవితం

అరోగ్యకరమైన ఆలోచనా ధోరణి
జీవితం లో విజయం సాధించుటకు
ఆనందమయమైన జీవనం సాగించుటకు అత్యావశ్యకం
అనారోగ్యకర ఆలోచనా విధానం ప్రగతికి చేటు
అశేష శారీరక , మానసిక వ్యాధులకు పుట్టినిల్లు
మానవ జీవితమంతా అశాంతి మయం
నిత్యం చింతలు, సమస్యలు, ఆందోళనలు
హృదయం ఒక మండుతున్న లావా
కటువైన ప్రవర్తనతో మానవ సంభందాలన్నీ దూరం
కృషి, పట్టుదల, తపనలతో పాటు
సానుకూల ఆలోచనా ధృక్పధం తో
నిత్యం ప్రశాంతం గా అరోగ్యకరం గా వుండే మనసుతో
ముందడుగు వేసిన నాడు
అనితర సాధ్యమైన విజయాలన్నీ మనకు స్వంతం
జీవితం ఒక విరబూసిన నందనవనం

విజయ రహస్యం

కాలం, ఖర్మం కలిసి రాలేదంటూ
జాతక చక్రం అనుకూలంగా లేదంటూ
జీవితం లో ప్రగతి సాధించలేకపోవుటకు
నెపాన్ని ఇతరులపై నెట్టేసి
నిమ్మకు నీరెత్తనట్లు హాయిగా
కూర్చునే వారు అధమాధములు
విజయం సాధించుటకు
తగిన మూల రహస్యం,సూత్రం
తమలోనే వున్నదని గ్రహించి
పట్టుదల, దీక్ష తపనలతో
క్రమబద్ధమైన ప్రణాళికతో
ధైర్యే సాహసే లక్ష్మీ అంటూ
ముందుకు సాగిన వారు ఉత్తములు
అనితర సాధ్యమైన విజయాలు వారికే స్వంతం

నేను చదివిన ఒక మంచి కధ - నాన్నా ! క్షమించండి

27-02-08 తేదీ గల నవ్య వార పత్రిక (కాజల్ ముఖ చిత్రం) లో నాన్నా ! క్షమించండి అన్న పేరుతో వచ్చిన ఒక కధను చదివాను. ఈ కధకు రచయిత ఎం, వెంకటేశ్వర రావు. మానవతా విలువలు, అభ్యుదయ భావాలు అంతరించిపోతున్న ప్రస్తుత తరుణం లో ఈ విలువలను కాపాడెందుకు ఒక యువకుడు చేసిన ప్రయత్నాన్ని ఈ కధలో అత్యద్భుతం గా ఆవిష్కరించారు. నాన్నా క్షమించండి అంటూ ఒక కొడుకు తన కన్న తండ్రికి రాసే ఉత్తరం తో ఈ కధ ప్రారంభమౌతుంది.అన్నయ్య, అక్కయ్య లు మంచి చదువులు చదివి జీవితం లో సెటిలై పోయారు. తమ్ముడి కి మాత్రం చదువు చక్క గా అబ్బలేదు.అత్తెసర మార్కులతో డిగ్రీ పాసవుతాడు. సహజం గానే పెద్ద వాళ్ళు చక్కని విద్యావంతులు అవడం వలన చిన్న వాడం టే చులకన భావం తమ్ముళ్లకు ఏర్పడుతుంది.

చిన్నవాడు బ్యాంకు పరీక్షలకు ప్రిపేరవుతుందగా తండి కొలీగ్ వచ్చి బ్యాంకు పేపరు ను అందించి ఈ మోడల్ పేపరు ప్రకారం ప్రిపేరవమని చెబుతాడు. ఆశ్చర్యం గా అదే పేపరు పరీక్షలో వస్తుంది. సరిగ్గా అక్కడే మన కధా నాయకుడిలో అంతర్మధనం ప్రారంభమౌతుంది. లీకయిన పేపరును చూడగానే అతనికి అసంతృప్తి, ఆత్మవంచనగా అనిపిస్తుంది.కష్టపడి చదివి అక్కడికి వచ్చిన తన తోటి వారిని మోసం చేయకూదదని నిర్ణయించుకుంటాడు. అప్పుదే విద్యార్ధి సంఘాల వారు వచ్చి పరీక్షను రద్దు చేయిస్తారు.జరిగిన విషయాన్ని చెబుదామని తనకు సహాయం చెసిన అంకుల్ ఇంటికి వెళ్లగా అక్కడ తన తండ్రే ఎంతో డబ్బు వెచ్చించి పరీక్షా పేపరును తన కోసం కొన్నాడని తెలుస్తుంది. జీవిత మంతా అంకిత భావం తో, క్రమ శిక్షణతో పని చెసిన తన తండి తన కోసం మొదటిసారిగా తప్పుడు పని చేసాడని తెలుసుకున్న మన కధా నాయకుడు తన తండి నుండి నేర్చుకున్న క్రమ శిక్షణ , నిజాయతీలను పెట్టుబడిగా ఒక చిన్న పరిశ్రమను స్థాపించాలన్న నిర్ణయం తీసుకొని, అదే విషయాన్ని తన తండ్రికి తెలియజెస్తాడు. ఈ ప్రయత్నం తప్పనిపిస్తే క్షమించమంటు తన ఉత్తరాన్ని ముగిస్తాడు.

రచయిత ఒక విభ్భిన్నమైన కధ వస్తువును ఎన్నుకొని, దానికి ఒక చక్కని రూపం ఇవ్వడం లో 100 శాతం మర్కులు కొట్టేసారు. స్వార్ధమే ఊపిరిగా బ్రతికే మన నవతరం యువకులకు ఈ కధ ఒక కనువిప్పు కాగలదు.రచయిత యొక్క శైలి, భావ ప్రకటన చలా బావున్నాయి. సాహిత్య అభిమానులందరూ తప్పక చదవవలసిన కధ ఇది.

ఆశావహ దృక్పధం

జీవన గమనం లో విజయం సాధించుటకు
ఆశావహ దృక్పధం అత్యావశ్యకం
వర్తమానం లో జీవిస్తూ విజయం సాధించగలనన్న
నమ్మకం కలిగి వుండడం విజయానికి ఒక ముఖ్య సూత్రం
గతం లోని వైఫల్యాలను గురించి చింతిస్తూ
భవిష్యత్తు గురించి ఆందొళన చెందుతూ
వర్తమానం లో అమూల్యమైన సమయాన్ని
వృధా చేసుకోవదం అవివేకుల లక్షణం
తనపై తనకు నమ్మకాన్ని పెంచుకుంటూ
ధైర్యాన్ని , ఆత్మ విశ్వాసాలను కూడ గట్టుకుంటూ
స్పష్టమైన లక్ష్యాలతో, ప్రణాళికలతో
ముందుకు సాగిన నాడు అన్నింటా విజయం తధ్యం

రైతన్నలు

దేశానికి వెన్నుముక్క మన రైతన్న
దేశాభివృద్ధిలో రైతన్నకు ఎంతో ప్రాధాన్యం
పల్లెలు ప్రగతి పధామున నడిచేందుకు
రైతన్నల పాత్ర బహు కీలకం
వ్యవసాయ ఆధారిత దేశం లో
తరచు నిర్లక్ష్యానికి గురయ్యె మన రైతన్న
వాతావరణ ప్రతికూలతలు, విద్యుత్ కోతలు
నకిలీ విత్తనాల పంపిణీ, దళారుల అజమాయిషీ
వ్యవసాయ రంగం లో తగ్గిన ప్రభుత్వ పెట్టుబడులు
సకాలం లో అందుబాటుకు రాని పంటలు
రైతన్నలకు లభించని గిట్టుబాటు ధరలు
రైతన్న ల కడగండ్లను పట్టించుకోని ప్రభుత్వాలు
నలుగురికీ అన్నం పెట్టిన అన్నపూర్ణ చెయ్యి
ఇప్పుడు పది మంది ముందు జాపవల్సిన దుస్థితి
రైతన్న ఆనందం గా వుంటేనే పల్లెలు సుభిక్షమౌతాయి
తద్వారా సుస్థిర దేశాభివృద్ధి సాధ్యం

డబ్బు డబ్బు డబ్బు

జన్మ సాఫల్యం

అన్ని జన్మలలో కంటే ఉత్కృష్టమైన ,
అతి దుర్లభమైన మానవ జన్మను పొంది
నమో విశ్వరూపాయ నమ: అను రీతిన
ఆ పరమాత్మను గుర్తెరిగి
ఉపాసించలేని జీవితం వ్యర్ధం
నామ, రూప, గుణ రహితమైన
ఆ పరబ్రహ్మమును దర్శించడమే
మన జీవిత లక్ష్యం ,గమ్యం పరమావధి కావాలి.
హృదయమును వివేకపూరితంగా ,
ఆత్మను మలిన రహితంగా చెసుకొని
కఠినమైన తపస్సుతో , సాధనతో
అరిషడ్వర్గములను లోబర్చుకొని ,
దుష్ట సంస్కారములను రూపు మాపుకొని
పరమాత్మను దర్శించి జన్మ సాఫల్యం పొందడమే మన కర్తవ్యం

తల్లిదండ్రులు

కనిపించని దైవానికి ప్రతిరూపాలు మన తల్లిదండ్రులు
తాను సృష్టించిన బిడ్డలకు అండ దండలుగా నిలబడి
వారి సంక్షేమం ,ప్రగతి కోసం
తానే తల్లిదండ్రులుగా ఆ పరమత్మ
అవతరించిన వైనం అపూర్వం అద్వితీయం
జీవితమంతా ఎనలేని త్యాగాలను ఒనరించి
రక్తాన్ని స్వేదంగా మార్చి ఎంతో కష్టించి
తమ స్వార్జితమంతా బిడ్డల కోసమే వెచ్చించి
ఆ తల్లిదండ్రుల త్యాగ నిరతి వర్ణింపదగనిది
వారి రక్త మాంసములను పంచుకు పుట్టి
వారి శక్తినంతా త్రాగేసి పెద్దవారలమైన మనం
వారిని నిర్లక్ష్యం చేయడం
వారిని అవసాన దశలలో అనాధలుగా వదిలివేసి
మన స్వార్ధం చూసుకోవడం క్షమించరాని నేరం
తల్లి దండ్రుల నిరాదరణ భగవంతుని నిరాదరణతో సమానం
రౌద్రవాది నరక ప్రాప్తి తప్పదు
మనం జీవించే ఈ ప్రపంచం సుఖంగా వర్ధిల్లాలంటే
వృద్ధులైన తల్లిదండ్రుల పట్ల
మన బాధ్యత నెరిగి ప్రవర్తించడం అత్యావశ్యకం

బద్ధ శత్రువులు

బద్ధకం, ఆలసత్వం అనునవి
మానవునికి బద్ధ శత్రువులు
ఆంతర్గతంగా మనస్సులోనే కొలువుండి
మానవులను అధమ పాతాళానికి తొక్కివేయును
మందభావం వలన కార్యశూన్యత సంభవం
తక్కువ శ్రమతో ఎక్కువ సాధించవలెనన్న
ఆలోచన శ్రమించే గుణం నుండి తప్పించును
తద్వారా కలుగు మందకొడితనం వలన
అడ్దదారులు తొక్కే ప్రయత్నం
ఎంతో సాధించవలెనన్న ఆలోచనలు
చివరకు ఏమీ సాధించలేదన్న నైరాశ్యం
మానవుల హృదయం కల్లోల భరితం చేయును
తీవ్రమైన సాధన వలన ఈ దుర్గుణములను
దూరం చేసుకొని, చలాకీగా
ఆనందోద్వేగాలతో ముందడుగు వేయు
కార్యశీలురకు అన్నింటా విజయం తధ్యం

సమ సమాజ స్థాపన

కులాల వారీగా మాతాల వారీగా
మన సమాజాన్ని విచ్చినం చేస్తున్న
అఖంఢ భారతా మాత కంట తడి
విద్రోహకర, వినాశకర శక్తులు
సర్వ మత, సర్వ మానవ ఏకత్వ భావనలు
నానాటికీ మన మధ్య నుండి మటుమాయం
అందరిలో ప్రవహించే రక్తమొక్కటే
అందరిలో నిగూడమై, నిక్షిప్తమై వున్న
అంతర్గత ప్రాణ శక్తి ఒక్కటే
ధర్మ సంస్థాపన కోసం వివిధ కాలముల యందు
ఈ భువిపై అవతరించిన మహనీయుల
బోధలే మనకు వివిధ మతాలు
అందరి ప్రవచన సారాంశం ఒక్కటే
అదియే సర్వ మత, సర్వ మానవ సమానత్వం
అందరం ఒక్కటే, అంతా ఒక్కటే
తమ స్వార్ధపూరిత ప్రయోజనాల కోసం
మనందరి మధ్య చిచ్చు పెట్టి తద్వారా
తమ పబ్బం గడుపుకోజూస్తున్నదుష్ట శక్తులను తిప్పి కొట్టండి
కుల మత రహిత సమ సమాజ స్థాపన కొరకు
అందరం నడుం బిగిద్దాం

దైవ సమానులు

నిస్వార్ధ తత్వంతో పదిమందితీ మంచిగా వుంటూ
వారి శ్రేయస్సే పరమావధిగా భావిస్తూ
త్రికరణ శుద్ధిగా సమాజ సేవ చేయు
మానవులు దైవ సమానులు
మానవ సేవే మాధవసేవ
హృదయశుద్ధి కలిగి
ఎల్లవేళలా సమాజ శాంతి కాంక్షించే
మహనీయులను అనుసరించడం అభిలషణీయం
సమాజ చైతన్యానికి నడుం బిగించి
సర్వాన్ని త్యాగమొనరించి
విశ్వశాంతికి కంకణం కట్టుకున్న
మహానుభావులు దైవానితో సమానం
అట్టి వారు సర్వదా ఆ పరమేశ్వరునికి ప్రీతిపాత్రులు
వారే మనకు మంచి దారి చూపగల సమర్ధులు

పల్లెలలో నాణ్యమైన విధ్య

పట్టణాలు ఆధునిక విద్యలో
రాకెట్ వేగంతో చంద్రమండలం కు
దూసుకు పోతుంటే మన పల్లెలలో మాత్రం
ఎక్కడి గొంగళి అక్కడే అన్న చందం
ప్రభుత్వం ఎన్ని పధకాలను చేప్పట్టిననూ
ఏ మాత్రం కాన రాని అభివృద్ధి
ఆరకొర వసతులు, అందుబాటులో లేని పుస్తకాలు
శిధిలావస్థలో పాఠశాల భవనాలు
చాలీ చాలని జీతాలతో అన్యమనస్కంగా
పనిచేసే ఉపాధ్యాయ సిబ్బంది
నానాటికీ తగ్గిపోతున్న ఉత్తీర్ణత శాతం
కొరవడిన అధికారుల పర్యవేక్షణ
పల్లెలలో నాణ్యమైన విధ్య ఒక మిధ్య

కలియుగ దైవం శ్రీసాయినాధులు

ఆద్భుతమైన, అపురూపమైన అసామన్య
గురుదేవులు, కలియుగ దైవం శ్రీసాయినాధులు
పిలిచినంతనే ఓయని పలికి
భక్త జనావళికీ ఆపన్న హస్తం అందించే సద్గురువు
నీటితో దీపాలు వెలిగించి భక్తజన హృదయాలలో
అజ్ఞానపు చీకట్లను దూరం చేసిన జ్ఞానస్వరూపి
దుష్ట శిక్షణకు, శిష్ట రక్షణకు
ధర్మ సంస్థాపన కొరకు మనపై కరుణతో
ఈ భువిపై అవతరించి లక్షలాది మందిని
సన్మార్గులను చేసిన అపురూపదైవం మన సాయి
తన పాదాల వద్ద తమ భారములను పడవేసిన
వారిభారమంతటినీ వహించి వారికి
అనుపమలభ్యం కాని శాశ్వత ఆనందమును
ప్రసాదించే ఆశ్రిత కల్పవృక్షం శ్రీ సాయి
సాయి నామమును ఉచ్చరించువారికి
సాయి పాదాలను శరణు వేడిన వారికి
అన్ని సమస్యలు, చింతనలు కడు దూరం

అముల్యమైన జీవితం

ఆతి అముల్యమైన, అందమైన ఈ జీవితాన్ని మనం
రాగ ద్వేషాలతో, అసూయా , కపటాలు ,కార్పణ్యాలతో
దుర్భరం చెసుకుంటున్న వైనం శోచనీయం
నీటి బుడగ వంటిది ఈ జీవితం
కన్ను మూస్తే జననం
కన్ను మూస్తే మరణం
క్షణ భంగురమైన ఈ జీవితం కోసం
ఎందుకీ అనవసర ప్రాకులాటలు ?
తోటి వారిని మోసం చేయడం
హింసించడం , మానసికంగా గాయపరచడమెందుకు ?
సాటి వారిని ఆప్యాయంగా పలుకరిస్తూ
వారి కష్ట సుఖాలలో పాలు పంచుకుంటూ
వున్న దానిలో అన్నార్తులకు సహాయం చేస్తూ
ధర్మయుతంగా కోరికలు తీర్చుకుంటూ
భగవంతుడిచ్చిన దానితో సంతృప్తి చెందుతూ
ప్రసాద భావంతో ఆనందకరమైన
జీవితం గడపడమే వివేకవంతుల లక్షణం

చర్విత చరణం

అధికారమనే కుర్చీలో కూర్చున్నంత వరకూ
గర్వాహంకారములతో, పదవి అనే దండాన్ని తిప్పుతూ
లక్షలకు లక్షలు అక్రమార్జన
ఎందరో అమాయకులను హింసించుట
మరెందరో జీవితాలను నరకప్రాయం
చేసిన అధికార దాహం , సాడిస్టు ప్రవర్తన
మానవీయ కోణాన్ని మరచిన ప్రవర్తన
అశాశ్వతమైన సిరి సంపదల వెనుక పరుగులు
ఈ రోజు పదవి పోయింది , సంపద దాయాదుల వశం
వృద్ధాప్యం ముంచుకొచ్చేసింది
యవ్వనంలో నిర్లక్ష్యం చేసినందున
బంధు మిత్ర వర్గమంతా దూరం దూరం
చిత్ర విచిత్రమైన వ్యాధుల బారిన పడిన శరీరం
క్షణ క్షణానికీ క్షీణిస్తోంది
గుక్కెడు నీళ్ళు పోసే నాధుడే లేడు
అనుభవించాల్సిన పాపాల చిట్టా ఇంకే మిగిలి వుంది

సద్గురువు

త్రిమూర్తుల స్వరూపమైన సద్గురువు
సర్వాంతర్యామి అని గ్రహించి
అన్ని రకముల అహంకారములను త్యజించి
సద్గురువులను శరణు పొందిన
మన అజ్ఞానము శ్రీఘ్రమే నశించును
ఇక మరే విధములైన బోధల అవసరము లేదు
సూర్యుని ముందు అంధకారము వుండని రీతిన
సద్గురువు సమక్షంలో మనకు భవసాగరము వుండదు
అన్ని రకములైన బంధాల నుండి విడిపడి
పరాన్ముఖులైన వారే సద్గురువు యొక్క
అనుగ్రహ వర్షంలోతడిసి మద్దగును,
జీవితం అగును సార్ధకం
అనుపమానమైన పరమానందం లభ్యం
నేను నాది అన్న భావం నుండి బయట పడి
అహంభావం లేక కర్మలను ఒనరించడం మన తక్షణ కర్తవ్యం

వివేచన

పైకి తలెత్తి చూసిన కొలదీ
విశాలమైన ప్రపంచం అగుపించు రీతిన
మానవునికి తన అంతరంగిక
స్థాయి పెంచుకోవడం అత్యావశ్యకం
వివేచనతో జ్ఞానమును పెంచుకోవడం
విశాలమైన హృదయమును కుంచింప జేసే
స్వార్ధమును తగ్గించుకోవడం
పరుల కోసం, పరమార్ధం కోసం జీవించడం
ఎల్లప్పుడూ లోక కళ్యాణమును త్రికరణ శుద్ధిగా
కోరుకోవడంమహనీయుల లక్షణం
చంచలమైన మనస్సును అదుపులో
వుంచుకొను వాడు జగద్విజేత అగును
గంగుగోవు పాలు గరిటడైననూ చాలన్నట్లుగా
బ్రతికిన మూణ్ణాళ్ళూ మహనీయుల
జీవనం అవలంబించుకోవడం అవసరం

నిస్వార్ధ తత్వం

తన కోసమే జీవించువాడు స్వార్ధపరుడు
పరుల కోసం సర్వం త్యాగం చేసి
వారి శ్రేయస్సే తన జీవిత లక్ష్యంగా భావించి
తదనుగుణంగా కృషి సల్పువాడు నిస్వార్ధపరుడు
స్వార్ధపరుని జీవితం గడ్డి మొక్కతో సమానం
ఎందుకూ , ఎవరికీ ఉపయుక్తం కానిది
తన కంటూ ఒక ఉనికిని సాధించుకోనిది
నిస్వార్ధపరుల జీవితం నిండుగా ఫలములను
ధరించు వృక్షము వంటిది
ఎన్ని రాళ్ళ దెబ్బలు తగిలిననూ ఓరిమితో
సహనముతో భరించి, ప్రతిఫలాపేక్ష లేక
నిత్యం రుచికరమైన ఫలములను, ఆశ్రయమును ఇస్తూ
తన కంటూ ఒక ప్రత్యేకతను సంతరించుకొనును
నిస్వార్ధ తత్వమే ఊపిరిగా
పరుల శ్రేయస్సే ధ్యేయంగా
జీవించువారి జీవితం కడు ధన్యం
ఆ సర్వేశ్వరునికి అత్యంత ప్రీతి పాత్రకరం

జ్ఞానోదయం

హే దీన దయాళువు,కరుణా సింధు
భక్త జన సంరక్షకా , సర్వేశ్వరా
మాపై నీ కరుణామృత చూపులను ప్రసరించు
త్రిమూర్తులను సైతం భ్రాంతిలో పడవేయగల
శక్తివంతమైన మాయలో పరిభ్రమిస్తున్నాము
ప్రేమ, కరుణ, అనురాగం, అప్యాయత వంటి
సద్గుణములను త్యజించి
మాయా, మోహిత అరిష్వడ్వర్గములకు లోబడిపోయి
భ్రాంతి పూరిత జీవనం గడుపుతున్నాము
అందుకే మా జీవితమంతా కష్టాలు, కన్నీళ్ళే
అనుక్షణం చింతనలు,ఆందోళనలు
మరుక్షణంలో ఏం జరుగునో అన్న భయంతో
సత్యానికి దూరంగా జీవిస్తున్నాము
శాశ్వతమైన పరమ శాంతికి దూరమై
అశాంతి , అసంతృప్తులతో మా
హృదయాలను నింపుకున్నాము
ఈ జీవన విధానం అసత్యమని, జీవించతగనిదని
నీ కృప వలన మాకు జ్ఞాదోయమయ్యింది
మా పాలిట దయతో, కరుణతో, మమ్మల్ని ఆశీర్వదించి
అసత్యం నుండి సత్యం వైపుకు
చీకటి నుండి వెలుగు లోనికి మమ్మల్ని నడిపించు
పగ, ద్వేషం, అహంకార రహిత జీవనాన్ని ప్రసాదించు

నవ్య భారత ఆవిర్భావం

అందరికీ నాణ్యమైన విద్య
చేతి నిండా పని
రెండు పూటలా తినడానికి తిండి
తల దాచుకోవడానికి స్వంత గూడు
శారీరక ఆరోగ్యం కోసం వైద్య సౌకర్యాలు
కుల , మత, వర్గ, ధనిక,
పేద వర్గాలనే భేధాలు లేక
అందరికీ, అన్ని వేళలా లభించిన నాడే
మన మహాత్ముడు కలలు కన్న
సమ సమాజ స్థాపన సాధ్యం
అను క్షణం తమ ఉనికి కోసం
తపన పడే రాజకీయ నేతల అజెండా లో లేని
ఈ సమ సమాజ స్థాపన కొరకు
మనమే తక్షనం నడుం బిగించాలి
సోషలిజం అనేది వారు చెప్పే
ఊక దంపుడు ఉపన్యాసాలలోనో లేక
విద్యా వేత్తలు రచించే అందమైన పుస్తకాలలోనో లేక
ఎ సి గదులలో కూర్చోని పేద ప్రజల
అభ్యున్నతి కోసంపధకాలను రచించి ,శ్రమిస్తున్నామనే
భావం కలుగజేసే బ్యూరోకట్ల వలనో రాదు
దశాబ్దాలుగా అందరిచే అతి దారుణంగా
మోసగించబడుతున్న మనలోజ్ఞానోదయం కలిగి
నూతన సమాజ నిర్మాణం కోసం
మనమే ఎట్టి బేధ భావాలు లేక
చేతులు కలిపి శ్రమించిన నాడూ
నిజమైన నవ్య భారత ఆవిర్భావం సాధ్యం